Гульня «Гаворым па-беларуску»
для вучняў VII класаў
Мэта: выхоўваць у навучэнцаў патрыятычную самасвядомасць і грамадзянскую культуру праз асэнсаванне духоўных каштоўнасцей, абуджэнне павагі і пачуцця любові да роднай мовы, ствараць умовы для творчай і сацыяльнай самарэалізацыі кожнага з дзяцей. Задачы: фарміраванне ўяўлення пра духоўныя каштоўнасці і іх ролю ў жыцці чалавека; развіццё моўнай чуйнасці, цікавасці да вывучэння беларускай мовы; выяўленне і падтрымка творчага патэнцыялу кожнага вучня. Эпіграфы:
1) Вобразная, вольная, пявучая, Мова беларуская мая!
Пімен Панчанка.
2) Мілая, адзіная Нам, нашчадкам, дадзена Любаю радзімаю Ад дзядоў і прадзедаў.
Уладзімір Мазго.
3) Магчыма, гэта і не нова, Што слова — зерне на сяўбе, А хто не любіць роднай мовы, Той любіць толькі сам сябе...
Сяргей Грахоўскі.
Ход мерапрыемства
Вядучы.
Прывітанне вам, гульцы — I дзяўчаты, і хлапцы. Гледачоў усіх вітаю, Добра бавіць час жадаю. Вам, гульцы, пабольш адказаў, Ды парупцеся ўсе разам! I, як песня жаўрукова, Будзе вечнай наша мова.
- Сёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія — мілагучнасцю. Але ў кожнага чалавека ёсць толькі адна мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. I вельмі дрэнна, калі чалавек пачынае забывацца на сваю мову, не шануе яе. Вядучы. Вельмі важна шанаваць і вывучаць мову свайго народа. Сёння ў нас ёсць магчымасць паглыбіць уласныя веды, падвысіць моўны ўзровень. Прапануем гэта зрабіць у час гульні «Гаворым па-беларуску».
Раўнд I. «Прадстаўленне каманд».
Капітаны прэзентуюць свае каманды.
Раўнд II. «Інтэлектуальная азбука».
(Вучні выцягваюць літару алфавіта, за 5 секунд неабходна назваць 3 словы на гэту літару)
Першы чытальнік (выконвае верш А. Дзеружынскага «Спадчына» ).
Ад дзядоў і прашчураў Засталася спадчына, Як сівой гісторыі сляды, Слых, пачуцці лашчыла Мова наша матчына I жыла. I будзе жыць заўжды. I Скарыны слыннага, I Купалы ўдумнага Словы — залатыя каласы, Словы векапомныя, Вабныя, чароўныя — Гэта нашай праўды галасы. Ад дзядоў і прашчураў Засталася спадчына... Мова беларуская жыве, Нібы сонца яснае, Вечна непагаснае Ў неабсяжнай неба сіняве.
Раунд III. «Перакладчык».
Запішыце па-беларуску словы, словазлучэнні, выканайце пераклад сказаў. Овощи, пища, жареный картофель, оладьи из картофеля; дайте, пожалуйста, ломтик хлеба; всегда желайте приятного аппетита; лакомство, карандаш, варёное яйцо, вкусный завтрак. Делайте так, чтобы людям, которые окружают вас, было хорошо. Весной снег в густых ельниках ещё держался и в конце апреля. Адказы: агародніна, ежа, смажаная бульба, дранікі (аладкі з бульбы); дайце, калі ласка, скібачку (лустачку) хлеба; заўсёды жадайце прыемнага апетыту (або: смачна есці); ласунак, аловак, варанае яйка, смачны сняданак. Рабіце так, каб людзям, якія вакол вас, было добра. Вясной снег у густых ельніках яшчэ ляжаў і ў канцы красавіка. Вядучы
Ты расы самай чыстай чысцей, ты крыніц самых звонкіх званчэй, наша простае, шчырае слова — беларуская родная мова…
Раўнд IV. «Тлумачальнік».
Удзельнікі каманд выцягваюць картку са словам: з 3 трох варыянтаў неабходна выбраць правільны
Вядучы (выконвае ўрывак з верша Н. Гілевіча «Спадчына» ).
Часта думаю: Што, каб не матчына песня? Чым бы дыхаў? На холадзе чым саграваўся б? Папрасімцам, напэўна, Бадзяўся б па свеце, Жабраком Між чужых і радні Пабіраўся б... ................. Я хачу зберагчы цябе, Матчына песня, Каб запоўніць табою Спусцелыя душы! Я хачу Пасяліць цябе ў сэрцах Нашчадкаў, Каб ніколі мяне Папракнуць не змаглі, Каб было перад смерцю Мне лёгка ад згадкі, Што я жыў недарэмна На роднай зямлі.
Раўнд V. «Грані слова».
Заданне 1. Выцягніце скрутачак і адгадайце, пра што ідзе гаворка (па тры на кожную каманду)
- У народзе гавораць, што яна можа аб нечым балець, яе можна ламаць над задачай, у яе можа што-небудзь стукнуць, яна можа трашчаць, на ёй можна хадзіць і яе можна задраць, на яе можна зваліцца як снег, у ёй часам гуляе вецер (ГАЛАВА).
- Беларусы кажуць, што яго можна павесіць і задраць, у яго можна даць, ім можна кляваць, ён можа быць гулькіным; мы не любім, каб нас за яго вадзілі , і калі яго сунуць у нашы справы, а занадта цікаўнай дзяўчынцы яго адарвалі (НОС).
- Беларусы адзначаюць, што на іх можна стаць ці падняцца, яны могуць заплятацца, іх можна не чуць пад сабою і іх можна браць пад пахі ці ў рукі (НОГІ).
- Іх можна развесіць, на іх можна чапляць лапшу, іх можна надраць ці абарваць і навастрыць, яны могуць завянуць, між іх мы часта прапускаем (ВУШЫ).
- Калі нам цікава, мы яго разяўляем, можам яго трымаць на замку, а можам у яго набраць вады, шмат праблем у таго, у каго ён дзіравы (РОТ).
- Нам не падабаецца, калі на яе нехта нам сеў ці ўзлез, калі яе мыляць, яна не чысцее, на яе могуць павесіць хамут. (ШЫЯ).
Вядучы (выконвае ўрывак з верша А. Нафрановіча «Родная мова» ).
Я — беларус, і мову гэту Да скону дзён мне берагчы. У ёй жа для пазнання свету Усе патрэбныя ключы. Як лёгкім кісларод, заўсёды Яна патрэбная так мне. У ёй залог маёй свабоды, 3 чаго і радасць удвайне. А моў, як і народаў, многа, I лепшых, горшых з іх няма. I, знаць, гавораць нездарма, Што мова дадзена нам Богам.
Будзь гараджанін ты, вясковец, Ні ў свеце, ні ля родных стрэх — Нідзе не грэбуй сваёй мовай, Бо гэта найвялікшы грэх. I, як парою ні жылося, Жаданым быў яе палон. У ёй спеў ветру, шэпт калосся, I ручайка вясёлы звон, I веснія раскаты грому, Празрысты пошчак салаўя... Яна заўжды заве дадому, Дзе б ні блукаў па свеце я.
Раўнд VI. «Паэтычны радок».
Прадоўжыце радкі, назавіце аўтара і верш. I каманда
Каб любіць Беларусь нашу мілую, Трэба ў розных краях пабываць. Разумею цяпер, чаму з выраю
___________________________
(.. .Жураўлі на Палессе ляцяць. Алесь Ставер. «Жураўлі на Палессе ляцяць».) II каманда
Было ў салдата два полі, Поле, дзе кветкі ірваў, Бегаў з сябрамі на волі,
_________________________________
(...I поле, дзе ён ваяваў. Анатоль Вярцінскі. «Два полі».) I каманда
Паміж пустак, балот беларускай зямлі, На ўзбярэжжы ракі шумнацечнай, Дрэмле памятка дзён, што ў нябыт уцяклі, —
___________________________________
(...Ўдзірванелы курган векавечны. Янка Купала. «Курган».) II каманда
Па-над белым пухам вішняў, Быццам сіні аганёк, Б'ецца, ўецца шпаркі, лёгкі
________________________________
(... Сінякрылы матылёк. Максім Багдановіч. «Маёвая песня».)
Вядучы. Хацелася б, каб наша слова жыло шмат стагоддзяў, радавала сваёй мілагучнасцю і прыгажосцю новыя пакаленні. Няхай льецца беларуская мова з радыё, тэлеэкранаў, упрыгожвае старонкі газет і кніг, гучыць на вуліцах і ў розных установах. Ведайце, што найлепшы ваш твар, вопратка ваша, душа ваша — родная мова. Гаварыце па-беларуску, бо заўтра наша мова вам, вашым дзецям і ўнукам стане неабходнай. Размаўляйце па-нашаму, каб людзі бачылі вашу вернасць сваёй мове. Размаўляйце з прыветнай усмешкай, з пяшчотай на вуснах — іншыя захочуць адказаць вам тым жа. I не саромцеся недасканалай гаворкі.
Падвядзенне вынікаў гульні.
Раўнд I. «Прадстаўленне каманд».
|
Раўнд II. «Інтэлектуальная азбука».
|
Раунд III. «Перакладчык».
|
Раўнд IV. «Тлумачальнік».
|
Раўнд V. «Грані слова».
|
Раўнд VI. «Паэтычны радок».
|